2019-imi ingerlariaqqiffiusumik ilinniakkamik naammassisut 272-iupput
2019-imi ingerlariaqqiffiusumik ilinniakkami naammassisut 272-iusimapput 10 pct.-inik qaffariarsimallutik. Taakku 64 pct.-ii Kalaallit Nunaanni naammassinnittuupput.
Piffissaq siusinnerusoq isigalugu ingerlariaqqiffiusumik ilinniakkamik naammassisartut amerleriarujussuarput. 2005-imut sanilliullugu 2019-imi ilinniaqqillutik naammassisut 101 pct.-inik qaffariaateqarput.
Titartagaq 1. 2005-imiit 2019-imut ingerlariaqqiffiusumik ilinniakkamik naammassinnissimasut nunami ilinniarfigisamut immikkoortillugit
Najoqqutaq: Naatsorsueqqissaartarfik - Kisitsisaataavimmiittut kisitsisit takukkit (http://bank.stat.gl/UDNISC11D) .
Ingerlariaqqiffiusumik ilinniagallit akornanni amerlanerpaat professionsbacheloritut ilinniagaqarput, ikittuinnaallu kandidatitut ilinniarnissartik qinertarlugu. Ineriartornerulli takutippaa kandidatitut naammassisartut amerlatsikkiartortut. 2019-imi kandidatitut ilinniarsimasut 33-upput, 2005-imut sanilliullugu marloriaamik amerlanerullutik. Kandidatitut amerlanerpaat nunani allani ilinniartarput.
Titartagaq 1. 2005-imiit 2019-imut ingerlariaqqiffiusumik ilinniakkamik naammassinnittartut ilinniakkap suussusaanut immikkoortillugit
Najoqqutaq: Naatsorsueqqissaartarfik - Kisitsisaataavimmiittut kisitsisit takukkit(http://bank.stat.gl/UDNISC11D).
Ilinniartut quliugaangata pingasut nunani allani ilinniartarput
2019-imi ilinniartut ingerlariaqqiffiusumik ilinniakkamik aallussisut 1.285-iupput. Taakkunanilu 906-it Kalaallit Nunaanni ilinniartuupput, 379-illu nunani allani ilinniartuullutik. Aallussisut amerlassusaat 2016-imitut inissisimapput. 2005-imut sanilliullugu ilinniarnermik aallussisut amerlassusaat 2019-imi 78 pct.-inik qaffasinnerupput. Kalaallit Nunaanni ingerlariaqqiffiusumik ilinniarfiit alliartornerujussuaq nalaappaat.
Kalaallit Nunaanni kandidatitut ilinniarnissamik aallartittut ikinnerusut
2015-imi ingerlariaqqiffiusumik ilinniakkamik aallartitsisut qaffasinnerpaaffissaminiippoq, kisianni tamanna maanna appariatorusaarpoq, 2019-imi 15 pct.-imik kandidatitut ilinniarnissamik aallartittut ikilisimapput. Ukiup ataatsip ingerlanerani Kalaallit Nunaanni ingerlariaqqiffiusumik ilinniakkamik aallartittut 15 pct.-inik ikilisimapput, Kalaallit Nunaata avataani aallartittut 8 pct.-imik amerlisimasut.